بھارتی فضائیہ کا روسی ساختہ لڑاکا طیارہ سخوئی 30 بھارتی ریاست آسام میں تیز پور ایئر بیس سے پرواز کے بعد لاپتہ ہو گیا۔
بھارتی اخبار کی رپورٹ کے مطابق سخوئی 30 ایم کے آئی معمول کی تربیتی پرواز پر روانہ ہوا تاہم تیزپور سے 60 کلومیٹر شمال کی طرف پہنچنے پر ریڈار سے غائب ہو گیا۔
واضح رہے کہ تیزپور ایئر بیس چینی سرحد سے 172 کلومیٹر کے فاصلہ پر واقع ہے۔ طیارے کے لاپتہ ہونے کے وقت علاقہ میں موسم خراب تھا۔
لاپتہ طیارے کی تلاش کیلئے کارروائی شروع کر دی گئی ہے۔ واضح رہے کہ بھارتی فضائیہ کے پاس اس وقت 230 سخوئی 30 ایم کے آئی طیارے موجود ہیں۔