اتحادی فوج پرحملہ کرنے والا شامی ڈورن مار گرانے کاامریکی دعویٰ

امریکی فوج نے عراق کی سرحد کے قریب واقع شام کے شہر التنف میں شامی فوج کا بغیر پائلٹ ڈرون طیارہ مار گرانے کا دعویٰ کیا ہے۔

العربیہ ڈاٹ نیٹ کے مطابق عالمی عسکری اتحاد کے ترجمان اور امریکی فوج کے کرنل ریان ڈیلون نے بغداد میںمیڈیا کوبتایا کہ امریکی فوج نے التنف کے قریب شامی فوج کا ایک بغیر پائلٹ ڈرون مار گرایا ہے۔

انہوں نے دعویٰ کیا کہ ڈرون طیارے سے اتحادی فوج پر فائرنگ کی گئی تھی۔ترجمان کا کہنا ہے کہ شامی فوج ڈرون طیارہ مار گرائے جانے کے نتیجے میں اتحادی فوج کا کوئی جانی نقصان نہیں ہوا۔

اتحادی فوج نے شامی فوج کی 2 گاڑیوں کوبھی تباہ کردیا۔اتحادی فوج کے ترجمان کا کہنا تھا کہ ہم صدر بشارالاسد کے خلاف جنگ نہیں لڑ رہے ہیں مگرہمیں اپنے دفاع کا حق ہے۔

خیال رہے کہ یہ پہلا موقع ہے کہ شامی فوج نے اتحادی فوج پر حملے کی کوشش کی ہے۔قبل ازیں کرنل ڈیلون نے بتایا تھا کہ شام میں متعین اتحادی فوج نے التنف قصبے میں امریکی حمایت یافتہ فورسز کی طرف اسلحہ سے لدی 2 گاڑیوں کو تباہ کردیا تھا۔

عراق اور شام کی سرحد پر واقع التنف قصبے میں گذشتہ کئی ماہ سے امریکا اور برطانیہ کی فوج موجود ہے۔