پاناما فسانہ اورکارکردگی ہمارا اعمال نامہ ہے،شہبازشریف

وزیراعلیٰ پنجاب شہباز شریف نے کہا ہے کہ ہماری کارکردگی ہمارا اعمال نامہ ہے جبکہ پاناما صرف افسانہ ہے،لوگ پاناما کا فسانہ نہیں وزیراعظم کے کارنامے یاد رکھیں گے۔

حویلی بہادشاہ پاور پراجیکٹ کی افتتاحی تقریب سے خطاب میں وزیراعلیٰ پنجاب نے کہا کہ میں آپ سے پوچھتا ہوں کہ کیا پاناما کے فسانے اور وزیراعظم نوازشریف کے کارناموں کا کوئی مقابلہ کرسکتا ہے؟

انہوں نے مزید کہا کہ ہم عدالتوں کے فیصلے کا احترام کرتے ہیں،جس نے نندی پور پروجیکٹ میں ڈاکہ زنی کی وہ آج احتساب پارٹی میں شامل ہے،اگر ملک کو آگے لے کر چلنا ہے تو بلاامتیاز کڑا احتساب کرنا ہوگا۔

شہبازشریف کا کہناتھاکہ عوام کی خدمت ہی وزیراعظم کا اعمال نامہ ہے،ہمارے منصوبوں کی شفافیت کی دنیا گواہی دے رہی ہے ،حویلی بہادر شاہ پاور پراجیکٹ سے فی میگا واٹ بجلی 4لاکھ 88 ہزار ڈالر میں حاصل ہوگی۔

انہوں نے مزید کہا کہ تین پاورپروجیکٹس میں 168ارب روپےکی بچت کی گئی،منصوبوں کے آغاز پر مخالفت ہی مخالفت تھی آج ان فیصلوں کے مثبت نتائج آئے ہیں۔