سری لنکن کپتان چندیمل بیمار ،بھارت کیخلاف پہلے ٹیسٹ سے باہر

بھارت کے خلاف ٹیسٹ سیریز کے پہلے مقابلے سے قبل سری لنکا کو بڑا دھچکا لگ گیا ،کپتان چندیمل نمونیا کا شکار ہوکر میچ سےباہر ہوگئے ہیں۔

زمبابوے کے خلاف ون ڈے سیریز میں شکست کے بعد اینجلو میتھیوز نے تینوں فارمیٹ کی قیادت سے استعفیٰ دے دیا تھا، جس کے بعد ٹیسٹ ٹیم کی قیادت چندیمل کو سونپ دی گئی تھی۔

چندیمل کی قیادت میں زمبابوے کے خلاف سنسنی خیز مقابلے کے بعد سری لنکن ٹیم فتح حاصل کرنے میں کامیاب رہی لیکن ایک ہی میچ میں کپتانی کے بعد بیمار ہو کر پہلے ٹیسٹ میچ سے باہر ہو گئے ہیں۔

27 سالہ چندیمل نمونیا کا شکار ہو کر اسپتال میں داخل ہو گئے ہیں اور ڈاکٹرز نے انہیں 3 سے 5 دن آرام کا مشورہ دیا ہے۔

26 جولائی سے گال میں ہونے والے ٹیسٹ میچ میں اب سری لنکن ٹیم کی قیادت اسپنر رنگنا ہیراتھ کریں گے ،جو گزشتہ سال میتھیوز کی غیرموجودگی میں بھی قیادت کے فرائض انجام دے چکے ہیں۔