وزیر اعظم کے احتساب سے جمہوریت مضبوط ہوگی، شفقت محمود

پاکستان تحریک انصاف کے رہنما شفقت محمود کہتے ہیں کہ ستم ظریفی یہ ہے کہ وزیر اعظم کہتے ہیں کہ ان کے احتساب سےجمہوریت کو خطرہ ہوگیا، ان کے احتساب سے توجمہوریت مضبوط ہوگی ۔

انہوں نے مزید کہا کہ اگر اصل میں کوئی کھلی کتاب ہے تو وہ عمران خان کی زندگی ہے ،17 سال کی عمر میں قوم کی نمائندگی کرنے کے بعد ان کی زندگی کا کوئی پہلو خفیہ نہیں ۔

شفقت محمود کا کہنا ہے کہ میاں شریف کے جوبھائی سیاست میں نہیں آئے ان کے کاروبار کاحال دیکھ لیں اور ان کا حال دیکھ لیں،عمران خان نے ذاتی پلاٹ بھی شوکت خانم کوعطیہ کیا ۔

انہوں نے کہا کہ قوم کا عمران خان پر اعتبار یہ ہے کہ وہ ایسے شخص ہیں جنہیں پاکستان کے عوام نے ساڑھے 6ارب روپے عطیہ دیا۔

شفقت محمود کا مزید کہنا ہے کہ عمران خان نے اقتدار سے باہر ہوتے ہوئے قوم کی خدمت کی،شریف خاندان پر کرپشن کے 29 کیسز ہیں۔

انہوں نے یہ بھی کہا کہ معصوم سا چہرہ بنا کر یہ کہتے ہیں کہ ہم نے کیا کیا ہے،فیصلے کی گھڑی آن پہنچی ہے، چند دن میں فیصلہ آجائے گا۔