قطر نے 80 ممالک کیلئے ویزا فری اسکیم متعارف کرادی

09 اگست ، 2017

قطر نے 80 ممالک کے لئے مفت ویزا اسکیم متعارف کرا دی، جس کا اطلاق فوری طور پر ہوگا۔

قطر کی جانب سے متعارف کرائی جانے والی فری ویزا اسکیم کے تحت یورپی یونین، مغربی ممالک، لاطینی امریکا اور ایشائی ممالک پر مشتمل 80 ممالک کے شہریوں کو مفت ویزا دستیاب ہوگا۔

حکام کے مطابق ویزا اسکیم میں شامل ممالک کے شہریوں کو صرف اپنا مستند پاسپورٹ دکھانا ہوگا، جس کے بعد انہیں ملک میں داخلے کی اجازت ہوگی، ویزا فری اسکیم قطر کو خطے کا آزاد ترین ملک بنادے گی۔

فری ویزا حاصل کرنے والے نمایاں ممالک میں امریکا، برطانیہ، کینیڈا، بھارت، جنوبی افریقا، آسٹریلیا، نیوزی لینڈ اور مشرقی افریقی ملک شامل ہیں،پہلے سے ویزا فری 6 خلیجی ممالک کے علاوہ لبنان واحد عرب ملک ہے، جسے اسکیم میں شامل کیا گیا ہے۔

مفت ویزا حاصل کرنے والے افراد کو ان کے ملک کی کیٹیگری کے حساب سے قطر میں قیام کی اجازت ہوگی، کم سے کم قیام کی مدت 30 روز اور زیادہ سے زیادہ 180 دن ہیں جبکہ شہریوں کے لئے 90 روز کا ویزا بھی ہے۔

قطر ٹورازم اتھارٹی کے قائمقام چیئرمین حسن ال ابراہیم کا کہنا ہے کہ فری ویزا اسکیم کے ذریعے لوگوں کو قطر کی جانب سے مہمان نوازی کا موقع ملے گا اور یہاں آکر غیر ملکیوں کو ثقافتی ورثے اور قدرتی خزانے کو دریافت کرنے کا موقع ملے گا۔

خیال رہے کہ نومبر 2016 میں قطر نے فری ٹرانزٹ ویزا متعارف کرایا تھا، جس کے تحت مختلف ممالک کے مسافروں کو کم سے کم 5 گھنٹے اور زیادہ سے زیادہ 4 دن تک قیام کی اجازت دی گئی تھی۔

تازہ ترین