سندھ سے پہلے کے پی میں احتساب کمیشن بن چکا ہے،سعید غنی

پیپلزپارٹی کے رہنما اور رکن سندھ اسمبلی سعید غنی کا کہنا ہے کہ پی ٹی آئی سندھ میں نیب کو قائم رکھناچاہتی ہےجبکہ سندھ سے پہلے کے پی میں احتساب کمیشن بن چکا ہے ،احتساب کا قانون چیلنج کرنےوالے اس میں خرابی بتائیں۔

سندھ نیب آرڈیننس کو ہائی کورٹ میں چیلنج کرنے والی اپوزیشن جماعتوں کو تنقید کا نشانہ بناتے ہوئے سعید غنی کا کہنا تھا کہ ایک ہی جرم کے خلاف 2 اداروں کا کام کرنا عجیب بات ہے، سندھ میں اینٹی کرپشن ادارہ احتساب کمیشن کی جگہ لے گا۔

پیپلزپارٹی کے رہنما کے مطابق اینٹی کرپشن کا سربراہ اسپیکر کو رکھا گیا ہے ، اگر اپوزیشن کو اسپیکر پر اعتراض ہے تو رائے دیں کہ ہمیں کیا کرنا چاہیے۔

سعید غنی نے کہا کہ سندھ میں نیب آرڈیننس ختم کئے جانے سے متعلق عدالت جو بھی فیصلہ کرے گی اسے مانیں گے۔

خیال رہے کہ سندھ ہائی کورٹ نے سندھ میں نیب آرڈیننس کے خاتمے کے خلاف ایم کیو ایم پاکستان اور مسلم لیگ فنکشنل کی مشترکہ درخواست کی سماعت کی اور عدالت نے نیب کو صوبے میں کارروائی جاری رکھنے کے احکامات جاری کئے۔