کراچی:نجی اسکولوں کی فیسوں میں اضافے کے خلاف والدین کا مظاہرہ

کراچی میں نجی اسکولوں کی جانب سے فیسوں میں اضافے کے خلاف والدین نے مظاہرہ کیا اور نجی اسکولوں کی انتظامیہ سے اضافہ واپس لینے کا مطالبہ کیا۔

پرائیویٹ اسکولوں کی جانب سے فیسوں میں من مانے اضافے کے خلاف والدین سراپا احتجاج بن گئے ۔ احتجاج شارع فیصل سے شروع ہوا اورایک نجی اسکول پر ختم ہوا ۔والدین کے مطابق 20 سے 25 فیصد اضافہ ان کی برداشت سے باہر ہے۔

آل سندھ پیرنٹس ایسو سی ایشن کے جوائنٹ سیکریٹری رضوان علی کا کہنا تھا کہ نجی اسکولز الدین کو بلیک میل کر رہے ہیں، سرکاری اسکول میں معیاری تعلیم نہ ہونے کی وجہ سے والدین کی مجبوری کا فائدہ اٹھایا جارہا ہے۔

والدین نے مطالبہ کیا کہ قانون کے مطابق 5فیصد اضافہ کیا جائے، من مانے اضافے کو روکا جائے۔انہوں نے مطالبہ کیا ہے کہ فیسوں میں اضافہ قانون کے مطابق کیا جائے۔

دوسری جانب نجی اسکول نے سندھ ہائی کورٹ کا فیصلہ آنے تک 5 فیصد اضافے پر رضا مندی ظاہر کردی ۔