راجن پور: ڈاکوؤں نے 7 پولیس اہلکاروں کو اغوا کرلیا

20 اگست ، 2017

راجن پور میں ڈاکوؤں نے پولیس چوکی پر حملہ کر کے 7 اہلکاروں کو اغوا کرلیا۔

ایس ایس پی راجن پور عتیق طاہر کے مطابق راجن پور کے علاقے روجھان میں ڈاکوؤں نے پولیس چوکی پر حملہ کیا جس کے بعد حملہ آور 7 اہلکاروں کو اپنے ساتھ لے گئے۔

ایس ایس پی راجن پور کے مطابق مغوی اہلکاروں میں لقمان، ذیشان، شاکر، صابر، جمشید ، صفدر اور مزمل شامل ہیں۔

عتیق طاہر کا کہنا ہے کہ پٹ گینگ کے سربراہ عطااللہ پٹ نے پولیس اہلکاروں کو اغوا کیا جب کہ مغوی اہلکاروں کی بازیابی کے لیے پولیس کی بھاری نفری کچے کے علاقے میں روانہ کردی گئی ہے۔

خیال رہے کہ ضلع راجن پور تین صوبوں پنجاب، سندھ اور بلوچستان کے سنگم پر موجود ہے جہاں اغوا برائے تاوان کی وارداتیں بھی عام ہیں۔دریائے سندھ یہاں بہت چوڑائی میں ہے اور اس میں کئی چھوٹے چھوٹے جزیرے ہیں جہاں جرائم پیشہ افراد اکثر اپنا ٹھکانہ بنائے رکھتے ہیں۔

ڈاکوؤں کے گروہ کے سرغنہ غلام رسول عرف چھوٹو مزاری کا تعلق بھی اسی علاقے سے ہے اور یہ کئی برس سے اغوا برائے تاوان کی وارداتوں میں ملوث رہا ہے جب کہ پولیس اہلکاروں کو بھی اغوا کرچکا ہے۔

تازہ ترین