پہلا ون ڈے :بھارت نے سری لنکا کو 9وکٹ سے شکست دے دی

بھارت نے پہلے ایک روزہ میچ میں سری لنکا کو 9 وکٹوں سے شکست دے کر 5 میچوں کی سیریز میں ایک صفر کی برتری حاصل کرلی ۔

دمبولا کرکٹ اسٹیڈیم پر کھیلے گئے پہلے میچ میں سری لنکا کی پوری ٹیم 43 اعشاریہ 2 اوورز میں 216 رنز پر ڈھیر ہوگئی، جواب میں بھارت نے شیکھروھون کی شاندار سنچری اور ویرات کوہلی کی ذمہ دارانہ بیٹنگ کی بدولت ایک وکٹ کے نقصان پر ہدف حاصل کرلیا۔

سری لنکا کی طرف سے ڈیک ویلا 64، دنوشکا گوناتھیلاکا 35، مینڈس 36 اور اینجلومیتھیوز 36 رنز ناٹ آئوٹ کے ساتھ نمایاں بیٹسمین رہے۔

بھارت کے اشر پٹیل نے میچ میں 34 رنز دے کر 3 جبکہ جادیو، چاہل اور بمرا نے بالترتیب 26 ،60 ،22 رنز دے کر 2 ،2  وکٹیں حاصل کیں۔

ہدف کے تعاقب میں بھارت کی پہلی وکٹ 23 کے اسکور پر گر گئی، روہیت شرما 4 رنز بناکر آئوٹ ہوئے، اس کے بعد شیکھر دھون نے کپتان ویرات کوہلی کے ساتھ مل کر 197رنز کی شراکت قائم کی۔

سری لنکا کے 216 رنز کے جواب میں بھارت نے ہدف 29 ویں اوور میں ہی حاصل کرلیا اور اسکور بورڈ پر 220 رنز سجائے، بھارتی اوپنر شیکھردھون نے 90 گیندوں پر 132رنز کی شاندار اننگز کھیلی، اس دوران انہوں نے 20 چوکے اور 3 چھکے لگائے۔

دوسرے اینڈ پر موجود بھارتی کپتان ویرات کوہلی نے 70 گیندوں پر 82 رنز بنائے، انہوں نے اننگ کے دوران 10چوکے اور ایک چھکا بھی لگایا۔

میچ میں عمدہ کارکردگی دکھانے پر شیکھر دھون کو مین آف دی میچ قرار دیا گیا۔ دونوں ٹیموں کے درمیان اگلا ایک روزہ میچ 24 اگست کو کھیلا جائے گا۔