پی آئی اے کے یومیہ اجرت حاصل کرنے والے ملازمین کی ہڑتال

پی آئی اے کے تین ہزار سے زیادہ یومیہ اجرت حاصل کرنے والے ملازمین نے دو ماہ سے تنخواہ نہ ملنے اور تقریبا 65 کروڑ روپے کے واجبات کی عدم ادائیگی پر آج صبح سے ہڑتال شروع کردی ہے۔

ایئرلائن ذرائع کے مطابق ٹھیکے داری نظام کے تحت کام کرنے والے پی آئی اے کے یومیہ اجرت پرکام کرنے والے ملازمین کو جون اور جولائی کی تنخواہوں کی ادائیگی ابھی تک نہیں ہوئی ہےجس پر احتجاجا ان ملازمین نے آج صبح سے ملک بھر میں کام بند کردیا ہے ۔

ہڑتال کی وجہ سے پی آئی اے انجینئرنگ ، ایئرپورٹوں اور دیگر شعبہ جات میں کام متاثر ہوا ہے ۔

ذرائع کا کہنا ہے کہ پی آئی اے کو مین پاور فراہم کرنے والی کمپنی کا 11 اگست کو معاہدہ ختم ہوگیا ، کمپنی پر ملازمین کی دوماہ کی تنخواہ ، تین سال کی گریجویٹی اور بقایا جات کی مد میں 65 کروڑ روپے واجب الادا ہیں ۔

پی آئی اے ترجمان کا کہنا ہے کہ ایک نئی کمپنی سے معاہدہ ہوگیا ہے ،ملازمین کو دو دن میں تنخواہوں کی ادائیگی کردی جائے گی تاہم گریجویٹی اور بقایا جات کی ادائیگی سابقہ کمپنی کی ذمے داری ہے پی آئی اے کی نہیں۔