روہنگیا مسلمانوں سے اظہار یکجہتی،امریکی شہروں میں مظاہرے

امریکا میں مقیم مسلمانوں کی جانب سے ریاست ٹیکساس کے دو بڑے شہروں ہیوسٹن اور ڈیلس میں روہنگیا مسلمانوں سے اظہار یکجہتی اور ان کونسلی اور مذہبی منافرت کا نشانہ بنانے کے خلاف ڈائون ٹائون میں مظاہرے کیے گئے۔

ڈیلس میں ریلی کو مسلمانوں کے انسانی حقوق کی علمبردار تنظیم(کیئر) کونسل آف امریکن اسلامک ریلشن نے دیگر 17انسانی حقوق کی تنظیموں کے ساتھ مل کر آرگنائز کیا ۔

ریلی کا مقصد امریکی عوام میں اس روہنگیا مسلمانوں کےساتھ نسلی امتیاز اور قتل عام سے آگاہ کرنا تھا جو روہنگیا کے مسلمانوں کے ساتھ وہاں کی حکومت کر رہی ہے۔

سہ پہر 3بجے نکالی گئی مذکورہ ریلینے شہر کے ڈائون ٹائون کی اہم شاہراہوں پر گشت کیا ۔اس موقع پر مظاہرین روہنگیا کے مسلمانوں کے خلاف ہونے والے ظلم و بربریت پر سراپا احتجاج تھے۔

ریلی کے شرکاء نے قتل عام کے خلاف کتبے اور بینرز اٹھائے ہوئے تھے،ان تنظیموں کا مقامی امریکی منتخب نمائندوں سے مطالبہ تھا کہ وہ انسانی حقوق کی اس پامالی کے خلاف آواز بلند کریں اور روہنگیا کے مسلمانوں کے حقوق کا تحفظ یقینی بنانے کیلئے دبائو بڑھائیں اور روہنگیا مسلمانوں کےقتل عام کو بند کرانے کیلئے اپنا کردار ادا کریں۔