نواز فیملی کے خلاف نیب ریفرنسز کی سماعت آج ہوگی

سابق وزیر اعظم نواز شریف اور ان کے اہل خانہ کے خلاف تین نیب ریفرنسز کی سماعت آج احتساب عدالت میں ہو گی۔ عدالت نے نواز شریف ، ان کے بچوں حسن نواز ، حسین نواز ، مریم نواز اور داماد کیپٹن صفدر کو ذاتی حیثیت میں طلب کر رکھا ہے۔

اسلام آباد کی احتساب عدالت میں سابق وزیر اعظم اور ان کے اہل خانہ کے خلاف العزیزیہ اسٹیل ملز، لندن فلیٹس سے متعلق ایون فیلڈ پراپرٹیز اور آف شور کمپنیوں سے متعلق فلیگ شپ انوسٹمنٹ ریفرنسز کی سماعت آج ہوگی۔

نیب نے پاناما کیس میں سپریم کورٹ کے احکامات کی روشنی میں شریف خاندان کے خلاف کرپشن ریفرنسز دائر کیے جنہیں اسکروٹنی اور رجسٹرار آفس کے اعتراضات دور ہونے کے بعد سماعت کے لیےاحتساب عدالت کو بھجوایا گیا ۔

احتساب عدالت نے نیب کی جانب سے دائر عبوری ریفرنسز میں نامزد ملزمان نواز شریف، حسن نواز، حسین نواز، مریم نواز اور کیپٹن ریٹائرڈ صفدر کو سمن جاری کرتے ہوئے آج ذاتی حیثیت میں عدالت میں پیش ہونے کا حکم دے رکھا ہے۔