خالد لطیف کا اینٹی کرپشن ٹریبونل میں نہ آنے کا فیصلہ

پاکستان سپر لیگ کا اسپاٹ فکسنگ کیس اپنے منطقی انجام کی جانب بڑھ رہا ہے۔ شرجیل خان کے بعد اس کیس کے ایک اور مرکزی کردار کرکٹر خالد لطیف کو بھی کل سزا ملنے کا امکان ہے،تاہم خالد لطیف اور ان کے وکیل نے کل اینٹی کرپشن ٹریبونل میں نہ آنے کا فیصلہ کیا ہے۔

وکیل خالد لطیف کا کہنا ہے کہ وقت کم ہےدوسرے شہرسے اتنا جلد آنا ممکن نہیں،سپریم کورٹ میں ٹریبونل کے خلاف اپیل دائر کی ہے۔

پاکستان کرکٹ بورڈ (پی سی بی) کا اینٹی کرپشن ٹریبونل کل دو پہر ایک بجے فیصلہ سنائے گا۔خالد لطیف پر اینٹی کرپشن کوڈ کی چھ شقوں کی خلاف ورزی کا الزام ہے۔

ذرائع کا کہنا ہے کہ خالد لطیف پر 10سال تک پابندی عائد کی جاسکتی ہے۔ رواں سال پاکستان سپر لیگ کے دوسرے ایڈیشن کے پہلے ہی میچ میں اسپاٹ فکسنگ کی باز گشت سنائی دی، جس کے بعد شرجیل خان اور خالد لطیف کو بورڈ نے معطل کردیا تھا۔