ایران کے صدر ڈاکٹر حسن روحانی نے کہا ہے کہ جوہری معاہدے کی خلاف ورزی کرنے والا ملک عالمی برادری میں تنہائی کا شکار ہو جائے گا۔
ایرانی خبر رساں ادارے سحر کے مطابق ایرانی صدر ڈاکٹر حسن روحانی نے گزشتہ روز اقوام متحدہ کی جنرل اسمبلی کے اجلاس کے بعد پریس کانفرنس کرتے ہوئے کہا کہ جوہری معاہدہ دو طرفہ معاہدہ نہیں بلکہ جس ملک نے بھی اس معاہدے کی خلاف ورزی کی وہ اپنے وعدوں کو توڑتے ہوئے تنہائی کی راہ پر گامزن ہو جائے گا۔
انہوں نے کہا کہ اگر امریکا اس معاہدے سے علیحدگی اختیار کرے تو امریکی عوام اور اس کے اتحادی ممالک بالخصوص یورپی ممالک اس کی حمایت نہیں کریں گے۔
صدر روحانی نے کہا کہ ہم ڈونلڈ ٹرمپ کی جانب سے گزشتہ روز اقوام متحدہ میں اپنی تقریر کے دوران ایرانی قوم کے خلاف غیر سفارتی زبان استعمال کرنے پر عوام سے معافی مانگنے کے منتظر ہیں۔