مسئلہ کردستان: عراقی قیادت آپس میں مذاکرات کرے، سعودی عرب

سعودی عرب نے عراق کی مرکزی قیادت اور صوبہ کردستان کے رہنماؤں پر زور دیا ہے کہ وہ مشترکہ قومی مفادات اور ملک کی وحدت کے لیے آپس میں مذاکرات کریں۔

عرب ٹی وی کے مطابق سعودی وزارت خارجہ کی جانب سے جاری کردہ ایک بیان میں کہا گیا ہے کہ عراقی قیادت کے درمیان ہونے والے مذاکرات ملک میں امن و استحکام، ملک کی وحدت اور خود مختاری کے ضامن ہونے چاہئیں۔

بیان میں صوبہ کردستان کی حکومت پر زور دیا گیا ہے کہ وہ خطے میں دہشت گردی کے خلاف جنگ میں حاصل ہونے والی کامیابیوں کی حفاظت کو یقینی بنائے۔ مزید کہا گیا ہے کہ سعودی عرب عراق کی تمام سیاسی قوتوں کو دستور کے تحت طے پانے والے معاہدوں پر عمل درآمد پر زور دیتا رہے گا۔

سعودی حکومت نے صوبہ کردستان کی قیادت کی طرف سے آزادی کے ریفرنڈم کو ملتوی کیے جانے کو خوش آئند قرار دیتے ہوئے کہا کہ اس فیصلے سے خطے کو کئی خطرات سے بچانے میں مدد ملے گی۔بیان میں مزید کہا گیا ہے کہ عراق میں کوئی بھی یک طرفہ اقدام خطے کے حالات کو مزید پیچیدہ بنانے کا موجب بن سکتا ہے۔