بھارتی جارحیت پر شہباز شریف کا اظہار مذمت

وزیراعلیٰ پنجاب شہبازشریف نے سیالکوٹ ورکنگ باؤنڈری پربھارتی فوج کی فائرنگ وگولہ باری کی شدید مذمت کرتے ہوئے قیمتی جانوں کے ضیاع پر افسوس کا اظہارکیا ہے۔

انہوں نے کہا کہ بھارتی فوج کی جانب سے شہری آبادی کو نشانہ بنانے کی جتنی بھی مذمت کی جائے کم ہے، پاک افواج بھارتی جارحیت کا منہ توڑ جواب دینے کی بھرپور صلاحیت رکھتی ہیں۔پوری قوم بہادر پاک افواج کے ساتھ کھڑی ہے۔

شہباز شریف نے گولہ باری کے باعث نقل مکانی کرنے والوں کے لیے ریلیف کیمپس قائم کرنے کی ہدایت کی اور کہا کہ ریلیف کیمپس میں لوگوں کو ضروری سہولتوں کی فراہمی جاری رکھی جائے۔

وزیراعلیٰ پنجاب کی ہدایت پر ڈپٹی کمشنر سیالکوٹ نے ریلیف کیمپس قائم کر دیے گئے۔