سید علی گیلانی کا اقوام متحدہ میں وزیراعظم کی تقریر کا خیر مقدم

کشمیری بزرگ حریت رہنما سید علی گیلانی نے اقوام متحدہ میں پاکستانی وزیراعظم شاہد خاقان عباسی کی تقریر کا خیر مقدم کیا ہے ۔

انہوں نے عالمی فورم پر مسئلہ کشمیر اجاگر کرنے پر پاکستان کا شکریہ ادا کرتے ہوئے عالمی برادری سے مطالبہ کیا ہے کہ مسئلہ کشمیر بلاتاخیر حل کرایا جائے۔

چیئرمین آل پارٹیز حریت کانفرنس سیدعلی گیلانی کا کہنا تھا کہ وزیراعظم شاہد خاقان عباسی کا خطاب حق و صداقت پر مبنی اور کشمیری عوام کی امنگوں کے عین مطابق تھا۔

انہوں نے مزید کہا کہ کشمیر کی جدوجہد آزادی پر پاکستان کے اخلاقی تعاون کے بھی شکرگزار ہیں، پاکستان نے ہمیشہ ہرعالمی فورم پر مسئلہ کشمیر اجاگر کرکے اسے کشمیری عوام کی خواہشات کے مطابق حل کرنے پر زور دیا ہے۔

بزرگ رہنما سید علی گیلانی نے یہ بھی کہا کہ پاکستان نے ثابت کیا ہے کہ وہ کشمیری عوام کا سچا خیر خواہ ہے، بھارت نے کشمیر پر ناجائز تسلط کے لیے ہمیشہ اوچھے ہتھکنڈے استعمال کیے اس کے باوجود بھارت کشمیریوں کی جدوجہد آزادی کو دبانے میں ناکام رہا ہے۔