ہرجانہ کیس، عمران خان کو جواب داخل کرنے کا آخری موقع

وزیر اعلیٰ پنجاب شہباز شریف پر دس ارب روپے کی پیشکش کرنے کے الزام پر چیئرمین تحریک انصاف عمران خان کے خلاف ہرجانے کے کیس کی سماعت لاہور کی سول عدالت میں ہوئی ۔

لاہور کی سول عدالت نے عمران خان کو جواب داخل کرنے کا آخری موقع دے دیا ،چیئرمین پی ٹی آئی کی پیروی کے لیے بابراعوان نے وکالت نامہ عدالت میں جمع کرا دیا۔

سماعت شروع ہوئی تو عمران خان کی پیروی کے لیے بابر اعوان کی جانب سے وکالت نامہ جمع کرایا گیا ۔

عدالت نے عمران خان کو جواب داخل کرانے کا آخری موقع دیتے ہوئے سماعت 9اکتوبر تک ملتوی کردی۔

اپریل 2017ءمیں عمران خان شہباز شریف پر الزام عائد کیا تھا کہ انہوں نے پاناما کے معاملے پر خاموش رہنے کے لیے دوست کے ذریعے دس ارب روپے کی پیشکش کی تھی۔

اس الزام پر شہباز شریف نے عمران خان کے خلاف دس ارب روپے ہرجانے کا دعویٰ دائر کیا تھا،جس میں مؤقف اختیار کیا گیا تھا کہ عمران خان کی الزام تراشی سے وزیراعلیٰ پنجاب کی ساکھ اور شہرت کو نقصان پہنچا ہے ۔