زمبابوے نے ویسٹ انڈیز کیخلاف ٹیسٹ ٹیم کا اعلان کر دیا

زمبابوے کرکٹ بورڈ کی سلیکشن کمیٹی نے ویسٹ انڈیز کے خلاف شیڈول ہوم ٹیسٹ سیریز کیلئے 16 رکنی سکواڈ کا اعلان کر دیا۔

برینڈن ٹیلر اور کائل جروس کی کائونٹی کرکٹ چھوڑنے کے بعد دوبارہ ٹیم میں واپسی ہوئی ہے، ٹیلر نے 2014 اور جروس نے 2013 میں ملک کی طرف سے آخری ٹیسٹ کھیلا تھا۔

آسٹریلین نژاد زمبابوین آل رائونڈر سولومون میر بھی جگہ بنانے میں کامیاب رہے اور توقع ہے کہ وہ کالی آندھی کے خلاف ٹیسٹ سیریز میں ڈیبیو کریں گے۔

زمبابوے نے سری لنکا کے خلاف کھیلے گئے ٹیسٹ سکواڈ میں سات تبدیلیاں کی ہیں، ریان برل، ٹنڈئی چتارا، تریسائی موساکنڈا، کارل مومبا، نٹسائی مشنگوے، نیتھن والر اور ڈونلڈ ٹریپانو کو ڈراپ کر دیا گیا، وکٹ کیپر بلے باز نیشا ماوایو اور ٹنڈئی چیسورو پہلی بار سلیکٹرز کا اعتماد حاصل کرنے میں کامیاب رہے۔

اعلان کردہ اسکواڈ جن کھلاڑیوں پر مشتمل ہے ان میںکپتان گریم کریمر، ہملٹن مسکڈزا، سولومون میر، چامو چیبھابھا، کریگ ایرون، برینڈن ٹیلر، سکندر رضا، سین ولیمز، میلکم والر، پیٹر مور، ریجس چاکبوا، مائیکل چینویا، کرس موفو، کائل جروس، ٹنڈئی چیسورو اور نیشا ماوایو پر مشتمل ہے۔