اثاثہ جات ریفرنس: نیب کے مزید 2 گواہان پر جرح آج ہوگی

وفاقی وزیر خزانہ اسحاق ڈار کے خلاف آمدنی سے زیادہ اثاثے بنانے کےنیب ریفرنس کی سماعت آج پھر ہو گی، جس میں نیب کے مزید 2 گواہان پر جرح کی جائے گی۔

احتساب عدالت نے مزید 2گواہوں کو بیان ریکارڈ کرانے کے لیے طلب کر رکھا ہے۔ وفاقی وزیر خزانہ اسحاق ڈار کے خلاف نجی بنک کے افسر مسعود الغنی اور عبدالرحمان گوندل بیان ریکارڈ کرائیں گے۔

وزیرخزانہ چھٹی بار احتساب عدالت کے سامنے ملزم کے طور پر پیش ہوں گے ۔ اب تک استغاثہ کے 28 میں سے3 گواہوں کے بیانات ریکارڈ کیے گئے ہیں۔

گزشتہ سماعت پر استغاثہ کے گواہ طارق جاوید پر اسحاق ڈار کے وکیل خواجہ حارث نے جرح کی تھی۔

واضح رہےاثاثہ جات ریفرنس میں 27 ستمبر کو اسحاق ڈار پر فرد جرم عائد کی گئی تھی۔

اسحاق ڈار پر الزام ہے کہ ان کے اثاثوں میں مختصر مدت میں 91 گنا اضافہ ہوا ، ان کے اثاثے ظاہر کردہ آمدن سے زائد ہیں۔