چیف جسٹس پاکستان جسٹس ثاقب نثار کا کہنا ہےکہ 26 اکتوبر سے سارک کانفرنس کے لیے سری لنکا جانا ہے اس لیے عمران خان اور جہانگیر ترین کیس کا فیصلہ ایک ساتھ کریں گے۔
سپریم کورٹ میں جہانگیر ترین نااہلی کیس کی سماعت ہوئی جس میں جہانگیر ترین کے وکیل سکندر بشیر دلائل دیئے۔
دوران سماعت چیف جسٹس پاکستان نے جہانگیر ترین کے وکیل سے استفسار کیا کہ ہم جاننا چاہتے ہیں شیئرز کے لیے کتنی رقم لگائی گئی اور اللہ یار نے کتنی رقم کے شیئر خریدے؟
وکیل سکندر بشیر نے موقف اختیار کرتے ہوئے کہا کہ جہانگیر ترین کے ملازموں نے 4کروڑ19 لاکھ کے شیئر خریدے،11کروڑ27 لاکھ روپے میں بیچے،ملازمین کو رقم جہانگیر ترین نے فراہم کی تھی،حصص کی خریداری کےوقت جہانگیرترین وزیر نہیں تھے ۔
چیف جسٹس نے ریمارکس دیئے کہ آپ سوالوں کے جواب دینے کے بجائے ادھر اُدھر سے نکل رہے ہیں،عمران خان اور جہانگیر ترین کیس کا فیصلہ ایک ساتھ کریں گے،گہرائی سے دونوں مقدمات کو دیکھ رہے ہیں۔
عدالت نے آج کیس کی مختصر سماعت کے بعد مزید سماعت کل صبح ساڑھے گیارہ بجے تک ملتوی کردی۔