ہر میچ میں اپنی کارکردگی سے ٹیم کو فتح دلانا ہدف ہے، بابر اعظم

پاکستان ٹیم کے ٹاپ آرڈر بیٹسمین بابر اعظم نے کہا ہے کہ ہر میچ میں سو فیصد کارکردگی کا مظاہرہ کرکے ٹیم کو فتوحات دلانا میرا ہدف ہے ۔

بابر اعظم نے سری لنکا کے خلاف جاری سیریز کے 4 میچوں میں 2سنچریوں اور ایک نصف سنچری کی مدد سے 303 رنز بنارکھے ہیں ،وہ اس وقت سیریز میں زیادہ اسکور کرنے والے کھلاڑیوں میں سرفہرست ہیں۔

ان کا کہناتھاکہ سری لنکا کے خلاف چوتھے ایک روزہ میچ میں ٹیم کی جیت میں اہم کردار کرنا میرے لئے باعث اعزاز ہے، مستقبل میں بھی کوشش ہو گی کہ اپنی کارکردگی سے ٹیم کی فتوحات میں اہم کردار ادا کروں۔

بابر اعظم نے یہ بھی کہا کہ مجھے اس بات کی خوشی ہے کہ میری اننگز ٹیم کی جیت کے کام آئی، میری ہر میچ میں ہمیشہ کوشش ہوتی ہے کہ عمدہ پرفارم کر کے ٹیم کو فتح دلائوں،اہداف کے حصول کیلئے میں سخت محنت کے تسلسل کو برقرار رکھوں گا۔