اردن میں ایک شخص نے پرانی گاڑی کا بہترین استعمال کرتے ہوئے اسے ہوٹل میں تبدیل کردیا،جسے دنیا کا سب سے چھوٹاہوٹل قرار دیا گیا ہے۔
جی ہاں، اردن میں 64 سالہ محمد الملاہیم نے اپنی پرانی گاڑی کو ہوٹل کی شکل دے دی۔ ان کے مطابق انہوں نےاپنے گائوںکے لوگوں کے لیے ایک ایسا ہوٹل تیار کیاہے جس میں وہ’ فائیو اسٹار ‘ہوٹل کا مزہ لے سکیں گے۔
محمد الملاہیم اپنے گائوں میں ابو علی کے نام سے مشہور ہیں انہوں نے امریکی نیوز چینل سے بات کرتے ہوئے کہا کہ ’یہ گائوں میرا وطن ہے، میں یہاں پیدا ہوا، بڑا ہوا، میں نے یہاں ساری زندگی گزار دی ، اب میں یہاں کچھ ایسا کرنا چاہتا ہوں کہ میرا وطن مزید خوبصورت لگےاور سیاحوں کی بڑی تعداد یہاں آئے‘، اس مقصد کے لئے انہوں نے دنیا کا سب سے چھوٹا ہوٹل بنانے کا فیصلہ کیا جس میں فائیو اسٹار ہوٹل جیسا مزہ آئے۔
ہوٹل کے اندرونی حصے کو روایتی انداز میں بنے قالین اور تکیوں سےسجایا ہے۔ ہوٹل میں اس بات کا خصوصی خیال رکھا گیا ہے کہ یہاں رہنےوالے افرادکو کسی قسم کی دشواری کا سامنا نہ کرنا پڑے۔
ابو علی نے مزید کہا کہ ہوٹل میں چائے، کافی اور اس کے ساتھ دیگر لوازمات پیش کیے جاتے ہیں، فی الحال کھانے کی سہولت میسر نہیں ہے۔