وزیراعظم کا بلوچستان کیلئے 10سالہ پیکیج کا اعلان

وزیراعظم شاہد خاقان عباسی نے بلوچستان کے لیے 10سالہ پیکیج دینے کا اعلان کیا ہے۔

کوئٹہ میں میڈیا سے گفتگو کرتے ہوئے وزیراعظم شاہد خاقان عباسی نے بلوچستان کے نئے پیکیج کے متعلق بتایا کہ اس پیکیج میں اسکول، گیس، بجلی اور پینے کے پانی کی فراہمی شامل ہوگی ۔

انہوں نے کہا کہ بلوچستان پیکیج کا آدھا فنڈ وفاق اور آدھا فنڈ صوبائی حکومت دے گی،کوشش ہوگی ہر دوسرے ماہ کوئٹہ آکر اس عمل کا جائزہ لیا جائے۔

و زیراعظم نے مزید کہا کہ حکومت چل رہی ہے، جون میں مدت پوری کرے گی، اس کے بعد دو ماہ میں انتخابات ہوں گے اور جمہوریت آگے چلے گی۔

شاہد خاقان عباسی کا یہ بھی کہنا ہے کہ حکمرانی آئین کے مطابق ہوتی ہے اور ہمیشہ قانون کی بالادستی ہونی چاہیے۔