پاکستان کی جانب سے بھارتی جاسوس کلبھوشن یادیوکی اہلیہ سےملاقات کی پیش کش پر بھارت کا موقف پاکستان کو موصول ہوگیا ہے۔
دفترخارجہ کا کہنا ہےکہ بھارتی حکومت کی جانب سے دیے گئے جواب کا جائزہ لے رہے ہیں۔
ذرائع سے معلوم ہوا ہے کہ کلبھوشن یادیو کے اہل خانہ کو گزشتہ سال مارچ میں اس وقت سرکاری تحویل میں لے لیا گیا تھا جب پاکستانی اداروں نے کلبھوشن یادیو کو پاکستان میں جاسوسی اور دہشت گردی کی منصوبہ سازی کے الزام میں گرفتار کیا تھا ،ان کی نقل و حرکت انتہائی محدود ہے تاہم ان کی خواہش پر رشتہ داروں سے ملاقات ممکن ہے۔
ذرائع کے مطابق بھارتی میڈیا نے انسانی ہمدردی کی بنیادوں پر کی جانے والی اس پیشکش کے جذبے کو مسخ کرتے ہوئے ایک نیا رنگ دینے کی کوشش کی ہے،گزشتہ دنوں بھارتی میڈیا نے اجتماعی طور پر یہ تاثر دینے کی کوشش کی ہے کہ پاکستان کی پیشکش عالمی عدالت کے دباؤ کے نتیجے میں کی گئی ہے۔