ڈیرہ اسماعیل خان میں دہشت گردوں کے خلاف کارروائی کے دوران شہید ہونے والے پاک آرمی کے میجر اسحاق کی تدفین مکمل فوجی اعزاز کے ساتھ پاک فوج کے شہدا قبرستان میں کردی گئی۔
لاہور کے ایوب اسٹیڈیم میں آج شہید کی نماز جنازہ ادا کی گئی جس میں وزیراعلیٰ پنجاب شہباز شریف، وزیر ریلوے خواجہ سعد رفیق، کور کمانڈر لاہور عامر ریاض سمیت شہید کے اہل خانہ اور رشتہ داروں کی بڑی تعداد نے شرکت کی۔
واضح رہے کہ شہید میجر اسحاق گزشتہ روز ڈیرہ اسماعیل خان میں دہشت گردوں سے لڑتے ہوئے شہید ہوگئے تھے۔ان کا تعلق خوشاب سے ہے اور وہ 6 بہن بھائیوں میں سب سے چھوٹے تھے، شہید کے پسماندگان میں بیوہ اور ایک سال کی بچی شامل ہے۔