سماجی رابطے کی ویب سائٹ فیس بک نےڈپریشن میں گرفتار افراد کےمسائل اور پریشانیوں کو دور کرنے کے لیے روبوٹ تیار کر لیا۔
برطانوی اخبار ’ڈیلی میل ‘ کے مطابق فیس بک میسنجر کے ذریعے ایک چیٹ بوٹ بنایا گیاہے جس کا نام ’ووبوٹ‘ ہے یہ مصنوعی ذہانت کی بنا پر انسانوں سے بات کرکے ان سے مایوسی اور اداسی کی وجہ جان کر انہیں دور کرنے کی کوشش کرتا ہے۔
چیٹ بوٹ کو سان فرانسسکو کی ایک کمپنی کی جانب سے تیار کیا ہے۔جس کا کہنا ہے کہ ووبوٹ آپ کے سینے سے بوجھ اتارنے کے لیے تیار کیا گیا ہے اور یہ متاثرہ انسان سے ایک جذباتی تعلق بنانے کی کوشش کرتا ہے۔ ووبوٹ کسی معالج کی طرح کام کرتا ہے اور مریضوں کو مشورے بھی دیتا ہے۔
ووبوٹ کو اس سال جون میں لانچ کیا گیا تھا لیکن اب یہ تیزی سے مقبول ہورہا ہے۔ یہ فیس بک میسنجر پر موجود ہے۔
ووبوٹ سے بات کرتے ہوئے آپ کو بالکل بھی محسوس نہیں ہوگا کہ آپ کسی انسان سے بات کررہے ہیں یا سافٹ ویئر سے، اور نہ ہی ووبوٹ کو یوزر کو پہچاننے میں کسی قسم کی مشکل پیش آتی ہے جب کہ بات چیت کے دوران وہ آپ کا حال احوال بھی پوچھتا ہے کہ ’ آپ کیسا محسوس کررہے ہیں۔‘
ابتدا میں اسے 70 ایسے طالب علموں پر آزمایا گیا جو ڈپریشن اور اداسی کے مستقل شکار تھے، ان طالبعلموں کو ایک خود رہنمائی کی کتاب دے کر چیٹ بوٹ سے دو ہفتے تک بات کرائی گئی تو اس سے بہت سے طالب علموں کو فائدہ ہوا۔
اس کے بعد ماہرین نے انکشاف کیا کہ چیٹ بوٹ موڈکو بہتر بنانے کی صلاحیت رکھتا ہے۔