انٹرنیشنل کرکٹ میں بگ تھری کا پلان فیل ہونے کے بعد بھارتی بورڈ اکیلا ہی کرکٹ کا سپر پاور بننے کا خواب دیکھنے لگا اور دیگر ملکوں کو ڈکٹیٹ کرنے کا پروگرام شروع کردیا ۔
ذرائع کے مطابق سنگاپور میں ہونے والے آئی سی سی چیف ایگزیکٹو اجلاس میں بی سی سی آئی کی جانب سے تجویز آئی کہ آئی پی ایل کو بائی لیٹرل فری کردیا جائے ، گویا جب بھارت میں آئی پی ایل ہوتو اس وقت کوئی دوسرا ملک کہیں بھی کرکٹ نہ کھیلے۔
بی سی سی آئی نے کرکٹ کی معیشت اور اپنی مارکٹ ویلیو کو استعمال کرتے ہوئے دیگر کرکٹ بورڈز پر اس بات کو یقینی بنانے کے لیے دبائو ڈالنا شروع کردیا ہے کہ وہ آئی پی ایل ونڈو کے دوران اپنی کوئی سیریز شیڈول نہ کرے ۔
بھارتی بورڈ کی بات نہ ماننے والے بورڈز کو انڈیاکے خلاف سیریز سے محروم ہونا پڑسکتا ہے،کیونکہ بھارت سے سیریز کی مارکیٹ ویلیو زیادہ ہوتی ہے اس لئے کوئی بورڈ بھی اس انڈیا سیریز گنوانے کا خطرہ مول لینے کو تیار نہیں ۔
واضح رہے کہ نئے پلان میں آئی سی سی نے دو طرفہ سیریز شیڈول کرنے کا اختیار کرکٹ بورڈز کو دے دیا ہے اور ہر ٹیم ایک سال میں صرف6 ٹیموں کے ساتھ کھیلنے کی پابند ہے ۔