امریکی سفارت خانے کی منتقلی بارود کے ڈھیر میں آگ لگانا ہے،امام کعبہ

خانہ کعبہ کے پیش امام وخطیب شیخ ڈاکٹر صالح آل طالب اور مسجد نبوی کے امام وخطیب شیخ ڈاکٹر حسین آل الشیخ نے اسرائیل میں امریکی سفارت خانے کو مقبوضہ بیت المقدس منتقل کرنے کی مذمت کی ہے۔

امام کعبہ ڈاکٹر صالح آل طالب نے واضح کیا کہ امریکی سفارتخانہ القدس منتقل کرنے کا فیصلہ بارود کے ڈھیر میں آگ لگانا ہے۔

انہوں نے کہا کہ بیت المقدس پر ناجائز قبضہ راسخ کرنے کیلئے جو اقدام حال ہی میں کیا گیا ہے اس سے مزید نفرت اور تشدد ہی جنم لے گا اس سے بلا وجہ بے شمار جانی اور مالی نقصان ہو گا، محنت رائیگاں جائے گی۔

امام کعبہ کا مزید کہنا ہے کہ یہ فیصلہ بین الاقوامی قراردادوں کے منافی ہے، اس سے ہر جگہ کے مسلمانوں کے دل دکھے ہیں۔

دوسری جانب مسجد نبوی شریف کے امام وخطیب شیخ ڈاکٹر حسین آل الشیخ نے بھی جمعہ کے خطبہ دوران فرمایا کہ مسجد اقصیٰ کے خاطر مسلمان بڑے سے بڑے چیلنج کا سامنا کریں گے اور کسی بھی قربانی سے دریغ نہیں کریں گے۔