انگلش کپتان کا مذاق اڑانے پر مداحوں کی پیٹرسن پر تنقید

ایشز سیریز میں آسٹریلیا کے ہاتھوں  انگلینڈ کی شکست کے باوجود سابق کرکٹر کیون پیٹرسن کی جانب سے انگلش کپتان جوروٹ کا مذاق اڑانا مداحوں کو پسند نہیں آیااور اُنہیں شدید تنقید کا سامنا کرنا پڑا۔

سابق انگلش ٹیسٹ کرکٹر کیون پیٹرسن نےایشز سیریز میں ٹیم کی کارکردگی پر رائے دیتے ہوئے سماجی ویب سائٹ ٹوئٹر پر ’’Captain Fantastic‘‘ کے کیپشن کے ساتھ جوروٹ کی ایک تصویر شیئر کی ہے، جس میں وہ واٹر گن لیے ہوئے ہیں۔

شائقین کرکٹ کو پیٹرسن کا یہ عمل قطعی پسند نہیں آیا اور جوابی پوسٹ کے ذریعے اُن پر شدید تنقید کی۔

پانچ میچوں کی سیریز میں آسٹریلیا نے انگلینڈ کے خلاف تین ۔صفر کی برتری حاصل کرلی ہے۔

انگلش کپتان جو روٹ نے 6 اننگز میں صرف 176 رنز بنائے ہیں جبکہ حریف ٹیم کے کپتان اسٹیو اسمتھ 426 رنز بناچکے ہیں جس میں پرتھ ٹیسٹ کی پہلی اننگز کے 239 رنز بھی شامل ہیں۔