سابق مصری جنرل سامی عنان کا صدارتی الیکشن لڑنے کا اعلان

مصر کے سابق چیف آف اسٹاف لیفٹنٹ جنرل سامی عنان نے صدارتی انتخابات لڑنے کا اعلان کردیا ہے۔

جنرل سامی عنان نے اس سلسلے میں مصری عرب جمہوری پارٹی کے نام سے نئی سیاسی پارٹی تشکیل دینے کا اعلان کیا ہےجس کی سربراہی وہ خود کرہے ہیں، بعد میں پارٹی نے جنرل عنان کو مارچ میں ہونے والے صدارتی انتخابات کے لیے بطور امیدوار نامزد کردیا ہے۔

جنرل سامی حافظ عنان فروری 1948 میں مصر کے صوبے دقہلیہ کے دیہات میں پیدا ہوئے انہوں نے فرانس کے فوجی کالج سے تعلیم حاصل کی۔ اگست 2012 میں معزول صدر محمد مرسی نے عنان کو برطرف کرکے انہیں صدارتی مشیر مقرر کیا تھا۔

جبکہ 2014 کے اوائل میں عنان نے خود کو صدارتی انتخابات کے لیے نامزد کیا مگر کچھ ہی روز بعد وہ اس دوڑ سے دستبردار ہوگئے تھے۔

یاد رہے کہ مصری الیکشن کمیشن کے اعلان کے مطابق صدراتی انتخابات کا پہلا مرحلہ 26سے 28مارچ تک منعقد ہوگا، تاہم پہلے مرحلے میں واضح نتیجہ نہ آنے کی صورت میں 24 سے 26 اپریل تک انتخابات کا دوسرا مرحلہ منعقد ہوگا۔