پاک جاپان بزنس کونسل کے صدر رانا عابد حسین نے حکومت پاکستان سے مطالبہ کیا ہے کہ وہ جعلی مقابلے میں ہلاک ہونے والے نقیب اللہ محسود کے اہل خانہ کے سر پر شفقت کا ہاتھ رکھے اور جعلی مقابلے کے ذمہ داروں کو کیفر کردار تک پہنچائے ۔
جنگ سے خصوصی گفتگو کرتے ہو ئے رانا عابد حسین نے کہا کہ جن قوموں میں انصاف ختم ہوجاتا ہے وہ قومیں تباہ ہوجاتی ہیں ، نقیب محسود کو جعلی مقابلے میں ہلاک کرنے کا واقعہ پاکستان میں انصاف کے حصول پر سوالیہ نشان ہے ، حکومت کو چاہیے کہ وہ مقتول کے اہل خانہ کی سرپرستی کرے ۔
ن لیگ کے مرکزی رہنما اور وفاقی وزیر سینٹر مشاہد اللہ خان سے ٹیلی فونک گفتگو کرتے ہوئے رانا عابد حسین نے کہا کہ اس طرح کے جعلی مقابلے بھی حکومت کے خلاف سازش سمجھے جانے چاہئیں جن سے سختی سے نمٹاجانا چاہئے ۔
رانا عابد حسین نے کہا کہ سی پیک منصوبے اور دیگر منصوبوں میں غیر ملکی سرمایہ کارپاکستان میں امن و امان کی صورتحال دیکھ کر ہی آتے ہیں لیکن جس طرح کراچی میں جاپانی سرمایہ کار کو اغواء کرنے کی کوشش کی گئی، زینب قتل کیس منظر عام پرآیا اور اب نقیب محسود کےمبینہ پولیس مقابلے کی با ز گشت سے دنیا بھر میں پاکستان کی بدنامی کا باعث بن رہی ہے لہٰذا حکومت کو اس طرح کے واقعات کے سد باب کے لیے سخت ایکشن لیان چاہیے ۔