بھارتی فورسز کی بلااشتعال فائرنگ کے واقعات کے باعث جہاں لائن آف کنٹرول پر کشید گی ہے وہیں سرحد پار سے ایک اچھی خبر ہے کہ پاکستان کی صباحت اور بھارت کے نقی علی طویل انتظار کے بعد شادی کے بندھن میں بندھ گئے۔
بھارتی میڈیا کے مطابق لکھنو کے 27 سالہ انجینئر نقی علی خان اور کراچی سے تعلق رکھنے والی صباحت فاطمہ کا نکاح آل انڈیا مسلم پرسنل لاء بورڈ کے نائب صدر مولانا کلب صادق نے پڑھایا۔
صباحت اور نقی علی کی شادی دوسال قبل طے ہوئی تھی تاہم سرحدوں پر کشیدگی کے باعث صباحت کو ویزا جاری نہیں ہوسکا تھا۔
بھارت کے ایک اخبار میں ایسی ہی نوعیت کا شادی کی خبر کے بعد صباحت کے لئے امید کی کرن پیدا ہوئی اور گزشتہ برس اُس نے سوشل میڈیا پر بھارتی وزیر خارجہ سشما سوراج سے رابطہ کیا۔ وزیر خارجہ کی منظوری کے بعد اُسے ویزا جاری کردیا گیا۔
نقی علی کے بڑے بھائی مظفر کا کہنا ہے کہ دونوں خاندان آپس میں رشتہ دار ہیں، دُلہا کی نانی اور دُلہن کی دادی آپس میں بہنیں تھیں اور تقسیم سے قبل لکھنو میں ایک ساتھ رہتی تھیں۔
دُلہا اور دُلہن نے اس تحفے پر سشما سوراج کا شکریہ ادا کیا ہے اور امید ظاہر کی ہے کہ بھارتی حکومت صباحت کو شہریت دینے میں بھی اُن کی مدد کرے گی۔