لیبیا نے کشتی حادثے میں90 افراد کی ہلاکت کی تردید کردی

لیبیا کے حکام نے کشتی ڈوبنے کے واقعے میں نوے افراد کی ہلاکت کی تردید کرتے ہوئے بتایا ہے کہ ابتک بارہ پاکستانیوں سمیت تیرہ لاشیں سمندر سے ملی ہیں۔

لیبیا کے نیول کمانڈر ایوب قاسم نے میڈیا سے بات چیت کرتے ہوئے کہا ہے کہ بحیرہ روم میں لیبیا کے سمندری حدود میں تلاشی کے کام کے دوران کسی حادثے کا شکار کشتی کا ملبہ یا لاشیں نہیں ملیں۔

انہوں نے نوے افراد کی ہلاکت سے متعلق بین الاقوامی ادارے کے دعوئوں کی تردید کرتے ہوئے مطالبہ کیا ہے کہ یہ ادارے اپنے دعوئوں کی وضاحت کریں اور جائے حادثے کا تعین کریں۔

دوسری جانب لیبیا کے شہر زوارہ کے پولیس ترجمان حافظ معمر نے کہا ہے کہ مغربی ساحل سمندر سے صرف تیرہ لاشیں ملی ہیں، جس میں سے بارہ لاشیں پاکستانی شہریوں کی اور ایک لاش لیبیا کی خاتون کی ہے، حافظ معمر نے مزید بتایا کشتی حادثے میں صرف تین افراد زندہ بچے ہیں، جن میں 2 لیبیا کے شہری اور ایک پاکستانی ہے۔