بھارتی بینک میں پونے دو ارب ڈالر کا فراڈ، ہیروں کے تاجر کی تلاش شروع

بھارت میں ہیروں کے تاجرنے مقامی بینک کو ایک ارب 80 کروڑ ڈالر کا چونا لگا دیا، حکومت نے تاجر نیرو مودی کے اثاثے منجمد کر کے تلاش کا نوٹس جاری کردیاہے۔

بھارتی تحقیقاتی ادارے سی بی آئی نے تاجر اور بینک ملازمین کے خلاف تحقیقات شروع کر دی ہیں، بھارت کے پنجاب نیشنل بینک کا کہنا ہے کہ ممبئی برانچوں میں گیارہ ہزار تین سو ساٹھ کروڑ بھارتی روپوں کے فراڈ اور غیرقانونی لین دین کا پتا چلایا گیا ہے۔

فراڈ کیس میں بھارت کے نامور ہیروں کے تاجر نیرو مودی پر دھوکا دہی کا الزام عائد کیا گیا ہے، بھارت کے قرضہ دینے والےادارے پی این بی نے سی بی آئی سے رابطہ کرلیا ہے، سی بی آئی نیرو مودی کے خلا ف فراڈ کی تحقیقات کر رہی ہے۔

اس سلسلے میں بھارتی تاجر نرو مودی کے ممبئی میں گھر اور شوروم سمیت کئی بھارتی شہروں میں چھاپے مارے گئے ہیں، وزیراعظم مودی کے دور میں بینک فراڈ کا ذمےدار کون ہے، اپوزیشن جماعت کانگریس نے اسکینڈل پر مودی سرکار سے سوال کر دیا ہے، بھارتی وزارت خزانہ نے تمام بینک برانچوں کو اپنے کھاتوں کی چھان بین کی ہدایت کردی ہے۔