پیپلز پارٹی کے مرکزی سیکرٹری اطلاعات سینیٹر مولا بخش چانڈیو نے کہا ہے کہ شہبازشریف کی موجودگی میں مریم نواز سے تقریر نہ کروا کے نوازشریف نے پارٹی میں ٹوٹ پھوٹ کا اعتراف کرلیا ہے۔
لودھراں میں نوازشریف اور شہبازشریف کی تقاریر پر ردعمل دیتے ہوئے مولابخش چانڈیو نے کہا کہ عوام جلد ہی مسلم لیگ ن میں ’م‘اور ’ش‘ کا اضافہ دیکھیں گے۔
انہوں نے مزید کہا کہ جھوٹ پر نااہل ہوئے نواز شریف نے آج پھر قوم سے جھوٹ بولا۔
پی پی رہنما کا یہ بھی کہنا تھا کہ کراچی کوامن میاں صاحب نے نہیں حکومت سندھ اور فورسز نے دیا ہے،نوازشریف نے کراچی آپریشن کے فنڈزکا وعدہ بھی پورا نہیں کیا۔
انہوں نے کہا کہ میاں صاحب نے اپنی سیاست کی طرح سی پیک کو بھی جی ٹی روڈتک محدود کردیا ہے ۔
مولا بخش چانڈیو نے یہ بھی کہا کہ شہبازشریف کی چرب زبانی کاجواب دینا سیاسی اخلاقیات کے منافی ہے۔