شام میں سرکاری فوج کی شدید بمباری سے تین روز کے دوران ہلاک ہونے والوں کی تعداد تین سو سے تجاوز کرگئی، اقوام متحدہ کے سیکریٹری جنرل نے مشرقی غوطہ میں فوری جنگ بندی کا مطالبہ کردیا۔
شام کی صورت حال پر نظر رکھنے والی تنظیم سیریئن آبزرویٹری فار ہیومن رائٹس کے مطابق شامی فوج کے جنگی جہازوں اور توپ خانوں نے لگا تار تیسرے روز بھی دارالحکومت کے مضافاتی علاقے مشرقی غوطہ پر شدید بمباری کا سلسلہ جاری رکھا۔
بدھ کو بمباری سے 55 افراد ہلاک ہوئے جبکہ علاقے کے چھ اسپتال بھی بمباری کے زد میں آکر کام کرنے کے قابل نہیں رہے، مشرقی غوطہ میں محصور چار لاکھ شہریوں کا باقی دنیا سے رابطہ مکمل طور پر منقطع ہے ۔