پی ایس ایل 3 کی افتتاحی تقریب پچھلے برسوں سے بہتر ہوگی، نجم سیٹھی

پاکستان سُپر لیگ کے چیئرمین نجم سیٹھی کا کہنا ہے کہ تیسرے پی ایس ایل کی افتتاحی تقریب پچھلے دو برسوں سے بہتر ہوگی۔

چیئرمین پی سی بی کا کہنا تھا کہ پڑوسی ملک کی لیگ والے بھی ہماری لیگ سے بہت متاثر ہوئے ہیں، وہ دبئی میں پاکستان سُپر لیگ کی افتتاحی تقریب میں پرفارم کرنے والے آرٹسٹوں کے ہمراہ پریس کانفرنس کررہے تھے۔

دبئی میں ہونے والی پریس کانفرنس میں معروف لوک گلوکارہ عابدہ پروین، علی ظفر اور شہزاد رائے بھی موجود تھے، اس موقع پر نجم سیٹھی کا کہنا تھا کہ پی ایس ایل کی افتتاحی تقریب پچھلے دو ایڈیشنز سے بہتر ہوگی۔

اُن کا کہنا تھا کہ جو فنکار افتتاحی تقریب میں پرفارم کریں گے اُن کا کوئی ثانی نہیں، عابدہ پروین نے کہا کہ لوگوں کو خوشیاں دینا صوفی ازم کا حصہ ہے، ملتان سلطانز کے شامل ہونے پر اُنہیں خوشی ہے ۔

علی ظفر نے بتایا کہ اس بار وہ افتتاحی تقریب میں منفرد انداز میں نظر آئیں گے، شہزاد رائے نے کہا کہ پی ایس ایل کا فائنل کراچی میں ہونا خوشی کی بات ہے۔