ورلڈ کپ کا سب سے بڑا ٹاکرا آج ہوگا

آئی سی سی میگا ایونٹ میں کرکٹ کی دنیا کےسب سے بڑے روایتی حریف پاکستان اور بھارت آج انگلینڈ کی سرزمین پر مدمقابل ہوں گے۔

پاکستان کی جانب سے محمد عامر، حسن علی، شاداب اور وہاب وکٹیں لینے کے لیے بیتاب جبکہ بھارتی کھلاڑی کوہلی، دھونی، روہت، راہول اور پانڈیا بڑی اننگ کھیلنے کا انتظارکررہے ہیں ۔

پاکستان بلے باز فخر، بابر، امام، حفیظ اور سرفراز چوکے چھکوں کے لیے تیار جبکہ بھارتی بالر بھمرا، یادیو، جادیجا اور بھووی وکٹیں گرانے کے خواہشمند ہیں۔

پاک بھارت ٹاکرے کے لیے مانچسٹر دیسی رنگ میں رنگ گیا،کرکٹ کے دیوانے اپنی ٹیم کی جیت اور دوسرے کی ہار کے لیے بے قرار ہو رہے ہیں۔

شائقین کا کہنا ہے کہ جس نے پریشر کو ہرا دیا، اس نے سامنے والے کو ہرا دیا۔

سوئنگ کے سلطان وسیم اکرم نے پاکستانی ٹیم کو مشورے دیتے ہوئے کہا کہ بھارت کے خلاف ٹیم دلیری کے ساتھ میدان میں اترے۔

دوسری جانب ہربھجن سنگھ کہتے ہیں پاکستان نے انگلینڈ کو ہرایا ہے اس کو آسان نہیں لیا جاسکتا پاکستان ٹیم کا بڑا انحصار عامر کی بالنگ پر ہوگا۔

ون ڈے کے ریکارڈ میں پاکستان بہت بھاری جبکہ ورلڈکپ میں بھارت ہمیشہ حاوی رہا ہے، پاکستان نے 73 میچز ہرائے جبکہ بھارت صرف 54 میں کامیاب رہا ہے، بھارت کی طرف سے سب سے زیادہ ٹنڈولکر نے 2526 رنز اور پاکستان کے انضمام نے 2403 رنز بنائے۔

پاکستان کے سلمان بٹ نے 21 میچز میں 5 سنچریاں بنائیں جبکہ ٹنڈولکر نے 5 سنچریوں کے لئے 69 میچز کھیلے، وسیم اکرم نے بھارت کے 60 کھلاڑیوں کا شکار کیا، جبکہ کمبلے نے 54 پاکستانی کھلاڑیوں کو آؤٹ کیا۔