نیوزی لینڈ کی جنوبی افریقہ کو 4 وکٹوں سے شکست

آئی سی سی کرکٹ ورلڈ کپ کے 25 ویں میچ میں نیوزی لینڈ نے جنوبی افریقہ کو 4 وکٹوں سے شکست دے دی۔

جنوبی افریقہ نے نیوزی لینڈ کو 242 رنز کا ہدف دیا جو نیوزی لینڈ نے 48 اعشاریہ 3 اوورز میں 6 وکٹوں کے نقصان پر حاصل کیا۔

ہدف کا دفاع کرتے ہوئے جنوبی افریقا کے سب سے نمایاں بولر کرس مورس رہے جنہوں نے نیوزی لینڈ کے 3 شکار کیے۔

پہلے بیٹنگ کرتے ہوئے جنوبی افریقا کی اننگز کا آغاز اچھا نہ رہا اور صرف 9 رنز پر ڈی کوک 5 رنز بناکر ٹرینٹ بولٹ کی گیند پر کلین بولڈ ہوگئے۔

ہاشم آملہ اور ڈوپلیسی نے دوسری وکٹ کی شراکت میں 50 رنز جوڑ کر ٹیم کا اسکور 59 تک پہنچایا، اس موقع پر کپتان ڈوپلیسی کو فرگوسن نے 23 رنز پر کلین بولڈ کردیا۔

نئے بیٹسمین مارکرم نے ہاشم آملہ کے ساتھ مل کر اننگز کو آگے بڑھایا، آملہ 83 گیندوں پر 55 رنز کی سست رفتار اننگز کھیل کر سینٹنر کی گیند پر کلین بولڈ ہوئے۔

مارکرم بھی تیزی سے رنز کرنے میں ناکام رہے اور 55 گیندوں کا سامنا کرکے 38 رنز پر آؤٹ ہوئے جبکہ ڈیوڈ ملر نے 36 رنز کی اننگز کھیلی۔

کیوی بولرز کی نپی تلی بولنگ کے باعث جنوبی افریقا کی ٹیم بڑا اسکور نہ کرسکی اور جیت کے لئے 242 رنز کا ہدف دیا ہے۔

فرگوسن نیوزی لینڈ کے سب سے کامیاب بولر رہے، انہوں نے 3 کھلاڑیوں کو آؤٹ کیا جبکہ بولٹ، گرینڈہوم اور سینٹنر نے ایک، ایک وکٹ حاصل کی۔

بارش کے باعث دونوں ٹیموں کی اننگز کا ایک، ایک اوور کم کردیا گیا تھا۔