مقبوضہ کشمیر، لاک ڈاؤن کا 37 واں دن، ہزاروں نوجوان ملازمتوں سے فارغ

10 ستمبر ، 2019

مقبوضہ کشمیر میں کرفیو اور لاک ڈاؤن 37 ویں روز بھی جاری، ہزاروں نوجوانوں کو ملازمت سے فارغ کر دیا گیا ہے جبکہ مقبوضہ کشمیر میں قابض انتظامیہ نے عاشورہ کے جلوس روکنے کے لیے پابندیاں مزید بڑھادیں ہیں۔

ذرائع کے مطابق پابندیوں کے باوجود سرینگر کے مختلف علاقوں میں نویں محرم کے جلوس برآمد ہوئے، ایمبولینسز اور طبی عملے کو بھی نقل و حرکت کی اجازت نہیں ہے ، سرینگر کے کمرشل حب لعل چوک اورملحقہ علاقوں کو خاردار تاریں لگا کر سیل کردیا گیا ہے اور عوام گھروں میں قید ہو کر رہ گئی ہے۔

بھارتی قابض فورسز کی جانب سے لاؤڈ اسپیکر پر شہریوں کو گھروں سے نہ نکلنے کی وارننگ دی جا رہی ہے جبکہ بھارتی فوج کے حملوں میں4 صحافیوں سمیت کئی افراد زخمی ہو گئے ہیں۔

دوسری جانب مقبوضہ کشمیر میں ایک ماہ سے زائد عرصے سے جاری بھارتی فورسز کے لاک ڈاؤن اور پابندیوں کی وجہ سے ہزاروں نوجوان بے روزگار ہوگئے۔

انٹرنیٹ اور موبائل فونز کی بندش سے موبائل سروسز کمپنیوں کوخسارے کا سامنا ہے جبکہ مقبوضہ وادی میں ایک ماہ سے مواصلاتی رابطے اور انٹرنیٹ بند ہے۔

مواصلاتی رابطوں کی بندش پر آئی ٹی کمپنیوں نے 15 سو نوجوانوں کو ملازمت سے فارغ کر دیا ہے، آئی ٹی کمپنیوں کا موقف ہے کہ جموں و کشمیر میں انٹرنیٹ اور موبائل فونز کی مسلسل بندش سے کمپنیوں کو شدید خسارے کا سامنا ہے۔

تازہ ترین