والد کو تکلیف دینا اور ترکہ پر قابض ہوجانا

13 ستمبر ، 2019

آپ کے مسائل اور اُن کا حل

سوال:۔ پچھلے سال میرے والد صاحب ہارٹ اٹیک کی وجہ سے وفات پاگئے ، والدہ محترمہ پہلے وفات پاگئی تھیں ، والد صاحب کی کچھ جمع پونجی تھی، ہم سات بہن بھائی ہیں، دو بیٹوں نے زبردستی گلہ توڑا، اس میں کچھ ان کی جمع پونجی تھی، مبلغ ساڑھے چار لاکھ روپے ،یہ رقم دو بھائیوں نے چوری کرکے آپس میں تقسیم کرلی ، باقی دوسروں کا کہنا ہے کہ ہمیں بھی اس میں سے حصہ دو، تم دونوں نے والد صاحب کی زندگی میں ان سےاچھا سلوک نہیں کیا ، انہیں ہر قسم کی اذیتیں دیتے رہے ہو، ایک دفعہ دونوں بھائیوں اور ان کی بیویوں نے والد صاحب کو کافی مارا پیٹا اور بات کافی بگڑ کر تھانے کچہریوں میں جا پہنچی،ان کے اس طرزِعمل کے بارے میں ازروئے شریعت رہنمائی فرمائیں۔

جواب:۔ والد کو ایذائیں دے کر اوران پر ہاتھ اٹھاکردونوں بیٹوں نے سخت حرام اورانتہائی درجے کی شقاوت اوربدبختی کا مظاہرہ کیا ہے۔ اگریہ نادان توبہ تائب نہ ہوئے تو آخرت کے ساتھ انہوں نے اپنی دنیا بھی برباد کردی ہے۔حق تعالیٰ کااحسان ہے کہ وہ بندے کو تلافی کا موقع عنایت فرماتے ہیں ،اس لیے ان پر لازم ہے کہ والد کے حق میں ان سے جو کوتاہیاں ہوئیں، ان پر اللہ پاک سے معافی مانگیں،والد کے لیے دعائیں کریں،ان کے لیےخوب ایصال ثواب کریں، ان کاتذکرہ خیر کریں ،ان کے رشتے داروں اور دوستوں سے حسن سلوک کا معاملہ رکھیں اورہر جمعے کو ان کی قبر پر حاضری دیں اور گناہوں کے ذریعے ان کوتکلیف نہ دیں۔والد کی جو جمع پونجی انہوں نے تنہا ہتھیا لی ہے، اس میں بقیہ تمام ورثاء کا حق ہے،اگر وہ دوسروں کو ان کا شرعی حق نہیں دیتے توغصب اورناحق دوسروں کامال کھانے کے مرتکب ہیں اور شریعت کے قانون میراث پر عمل نہ کرنے کی وجہ سے ظالم اورغاصب ہیں۔

تازہ ترین