فرمان الہی
نماز کے اوقات
اسلام آباد(نمائندہ جنگ)امریکا نے چین، میانمار، شمالی کوریا اور بنگلادیش کے درجنوں افراد اور ان ممالک سے تعلق رکھنے والے متعدد اداروں پر بھی وسیع پیمانے پر انسانی حقوق کی پامالیوں سے متعلق پابندیاں عائد کر دی ہیں۔اس کے علاوہ امریکا نے چین کی ایک مصنوعی انٹیلی جنس کمپنی کو بھی سرمایہ کاری کی بلیک لسٹ میں ڈال دیا ہے۔میڈیا رپورٹس کے مطابق کینیڈا اور برطانیہ نے بھی میانمار میں انسانی حقوق کی پامالی پر پابندیاں عائد کی ہیں جب کہ جوبائیڈن انتظامیہ نے شمالی کوریا پر ایک نئی پابندی عائد کی ہے۔جوبائیڈن انتظامیہ نے انسانی حقوق کے عالمی دن کے موقع پر یہ پابندیاں عائد کیں جن میں میانمار کی فوج کے کچھ اداروں پر بھی پابندیاں لگائی گئی ہیں۔امریکی حکام کا کہنا تھا کہ برطانیہ اور کینیڈا کے ساتھ مل کر ہمارا یہ ایکشن ایک پیغام ہے کہ دنیا بھر میں جمہوری طاقتیں ان لوگوں کے خلاف بھرپور کارروائی کریں گی جو ریاست کی رٹ کو پامال کریں گے۔امریکی حکام نے کہا کہ امریکا انسانی حقوق کی سنگین پامالیوں میں ملوث افراد کو قابل احتساب بنانے کے لیے اپنے تمام طریقے استعمال کررہا ہے۔
