کراچی، غیرقانونی پارکنگ فیس لینے والوں کیخلاف کارروائی کا حکم

کراچی(آئی این پی/اسٹاف رپورٹر ) سندھ ہائیکورٹ نے غیر قانونی پارکنگ فیس لینے والوں کے خلاف کارروائی کا حکم د یتے ہوئے آئندہ سماعت پر فریقین کے وکلا کو تیاری کے ساتھ پیش ہونے کا حکم دیدیا ۔ 

پیر کو سندھ ہائیکورٹ میں غیر قانونی پارکنگ فیس وصول کرنے کے خلاف دخواست پر سماعت ہوئی جس سلسلے میں ڈی ایم سی حکام اور دیگر عدالت میں پیش ہوئے۔

پارکنگ فیس حوالے سے ڈی ایم سی حکام نوٹیفکیشن نہ دے سکے، عدالت نے شہر میں غیر قانونی پارکنگ فیس وصول کرنے پر شدید برہمی کا اظہار کیا اور غیر قانونی پارکنگ فیس لینے والوں کے خلاف کارروائی کا بھی حکم دیا۔

 سندھ ہائیکورٹ کے جسٹس اقبال کلہوڑو نے کہا کہ جگہ جگہ غیرقانونی پارکنگ فیس وصول کرنے والے موجود ہیں اور پارکنگ فیس وصول کرنے والوں نے بدمعاش لوگ بٹھائے ہوتے ہیں، کسی کےپاس 20 روپے نہیں ہوتے تو یہ لوگ معزز شہری کو بے عزت کرتے ہیں۔

لوگ اپنی فیملیوں کے ساتھ جاتے ہیں تو یہ لوگ 20 روپے کے لیے تنگ کرتے ہیں، ان کے خلاف کوئی کارروائی کیوں نہیں کرتا؟ ۔انہوں نے کہا کہ پولیس والے کہتے ہیں ہمارا مسئلہ نہیں، ٹریفک پولیس کہتی ہے ہمارا مسئلہ نہیں۔