کراچی: ماہی گیروں کی 77 لانچیں واپس آگئیں

22 جنوری ، 2022

کراچی اور اطراف میں تیز ہواؤں اور جھکڑ چلنے کے نتیجے میں سمندر میں طغیانی کے باوجود ماہی گیروں کی 77 کشتیاں واپس آ گئی ہیں۔

فشرمین کوآپریٹو سوسائٹی کراچی کے سیکیورٹی انچارج ناصر بونیری کے مطابق گزشتہ روز کراچی اور اطراف کی جیٹیوں سے صبح 4 بجے اگلے 12 گھنٹوں کے لیے تمام چھوٹی لانچوں کی روانگی روک دی گئی تھی۔

دوسری جانب ضلع ٹھٹھہ کی بندر گاہ کیٹی بندر کے قریب کھلے سمندر میں تیز ہواؤں سے طغیانی کے باعث 3 کشتیاں ڈوب گئیں، جس کے نتیجے میں 38 ماہی گیر لاپتہ ہو گئے۔

فشر فوک فورم کے ترجمان نے بتایا ہے کہ تیز ہواؤں کے باعث سمندر میں طغیانی ہے، جس کی وجہ سے سمندر میں 3 کشتیاں الٹ کر ڈوب گئیں۔

ترجمان فشر فوک فورم نے بتایا ہے کہ ایک کشتی کے 5 ماہی گیر تیر کر کیٹی بندر پہنچ گئے جبکہ دوسری کشتی کے 20 اور تیسری کشتی کے 18 ماہی گیر لاپتہ ہیں جن کی تلاش جاری ہے۔

قومی خبریں سے مزید