بھارت، رمضان میں انتہا پسند ہندوؤں کا مسلمانوں پر تشدد

11 اپریل ، 2022

بھارت میں رمضان کے دوران انتہا پسند ہندوؤں کا مسلمانوں پر تشدد

بھارت کے مختلف حصّوں میں رمضان کے مقدس مہینے کے دوران انتہا پسند ہندو مسلمانوں پر حملے کرکے دہشت پھیلا رہے ہیں۔

اس حوالے سے مائیکروبلاگنگ سائٹ ٹوئٹر پربہت سی ویڈیوز وائرل ہیں، جن میں انتہا پسند ہندو حیدرآباد، گجرات، کرناٹک، گوا، جھارکھنڈ اور بنگال میں مسلم کمیونٹی کے خلاف نفرت انگیز تقاریر کرتے نظر آرہے ہیں۔

بھارتی حیدرآباد میں ہندوؤں کے ایک تہوار رام نومی کے موقع پر ایک ریلی نکالی گئی جس میں ہندو انتہا پسندوں نے مسلمانوں کے خلاف نفرت انگیز گیت گائے۔

جس میں کچھ اس طرح کے الفاظ تھے کہ؛

سارے بھارت کو ہندو راشٹر بنانا ہے
جو رام کا نام نہ لے اسکو بھارت سے بھاگنا ہے

اس گانےسے اقلیتوں، خاص طور پر ہندوستان میں رہنے والی مسلم کمیونٹی کو نشانہ بنایا گیا۔

گجرات کے علاقے ہمت نگر میں رام نومی کے جلوس میں شامل شرپسندوں نے مساجد، درگاہوں اور دکانوں کو بھی نشانہ بنایا۔

گوا میں ایک گروہ نے ایک مسجد میں گھسنے کی کوشش کی جو کہ مسلمانوں پر حملہ کرنا چاہتے تھے۔

انتہاپسند ہندوؤں کے ہجوم نے مسلمانوں پر الزام لگایا کہ مسجد سے کسی نے رام نومی کے جلوس پر پتھراؤ کیا ہے۔

ہندوؤں کے تہوار رام نومی کے جلوس کے دوران بنگال، جھارکھنڈ، مدھیہ پردیش اور کرناٹک میں بھی تشدد کیا گیا، جس کے بعد پولیس نے کچھ علاقوں میں بڑے اجتماعات پر پابندی لگا دی ہے۔

بین الاقوامی خبریں سے مزید