کافی ود کرن ٹی وی اسکرین پر واپس نہیں آرہا، ، کرن جوہر

04 مئی ، 2022

بھارتی فلم ساز کرن جوہر نے واضح کیا ہے کہ ان کا شو کافی ود کرن ٹی وی اسکرین پر واپس نہیں آرہا، اب یہ او ٹی ٹی پر اسٹریم ہوگا۔

اس سے قبل فلم ساز نے اعلان کیا تھا کہ ان کا پسندیدہ اور مشہور ٹاک شو کافی ود کرن جو 2004 سے آن ایئر ہورہا واپس نہیں آرہا ہے، تاہم چند گھنٹوں بعد انہوں نے انکشاف کیا کہ کہانی میں تھوڑا ٹوئسٹ ہے، انہوں نے وضاحت کی کہ شو ٹی وی پر واپس نہیں ائے گا، یہ اب او ٹی ٹی پر اسٹریم ہوگا۔

کرن جوہر نے سوشل میڈیا پر ایک نوٹ میں کہا تھا کہ چھ سال سے یہ شو اور ناظرین میری زندگی کا اہم حصہ رہے ہیں لیکن اب اسے الوداع کہنے کا وقت آگیا ہے۔

کرن جوہر کا اپنے نوٹ میں کہنا ہے کہ میں بوجھل دل کے ساتھ اعلان کررہا ہوں کہ کافی ود کرن واپس نہیں آرہا۔

کرن جوہر کے اس اعلان نے ان کے کئی مداحوں کو مایوس کردیا تھا، آرٹسٹ راجہ کماری نے اسے ’ایک دور کا اختتام‘ قرار دیا ہے۔

ایک اور سوشل میڈیا صارف نے تحریر کیا کہ مجھے بتاؤ یہ ایک مذاق ہے!!

حالیہ دنوں میں ایسی بھی اطلاعات تھیں کہ کرن جوہر ساتویں سیزن کی تیاری کررہے ہیں اور مہمانوں کی فہرست میں اکشے کمار، ورون دھون، کیارا ایڈوانی، انیل کپور، نیتو سنگھ، سدھارت ملہوترا اور کترینہ کیف کے نام سامنے آئے تھے۔

نوبیاہتا عالیہ بھٹ اور رنبیر کپور کی ساتویں سیزن میں بطور پہلے مہمان شرکت بھی متوقع تھی۔