وزیر داخلہ رانا ثناء اللّٰہ کی شہباز گِل پر تنقید

وزیر داخلہ رانا ثناء اللّٰہ نے پی ٹی آئی رہنما شہباز گل پر تنقید کرتے ہوئے کہا ہے کہ حادثے کے بعد وہ گاڑی سے نکل کر پانی پی رہے تھے تو بالکل ٹھیک ٹھاک تھے، لیکن جب عدالت گئے تو ایسا لگ رہا تھا کہ ان کی دس پندرہ ہڈیاں ٹوٹی ہوئی ہیں۔

انہوں نے کہا کہ شہباز گل کے ساتھ جو حادثہ پیش آیا، اس کا ملزم گرفتار ہے، اس کے کوائف بتاتے ہیں کہ اس کا تعلق (ن) لیگ سے نہیں ہے۔

رانا ثناء اللّٰہ نے مزید کہا کہ ملزم کا تعلق (ن) لیگ سے نہ ہونے کے باوجود عمران خان نے جلسے میں اس کا الزام بھی ہم پر لگا دیا۔

شہباز گل کی گاڑی کو مبینہ ٹکر مارنے والی گاڑی کی شناخت کرلی، موٹروے پولیس

موٹروے پولیس کے مطابق ٹکر لگنے کے بعد گاڑی کا ڈرائیور رکنے کے بجائے فرار ہوگیا۔

واضح رہے کہ حافظ آباد میں موٹر وے ایم ٹو پر پی ٹی آئی کے رہنما شہباز گِل کی گاڑی کو ٹکر مارنے کے الزام میں مقدمہ درج کرکے ایک ملزم کو حراست میں لیا گیا ہے۔

دوسری جانب پولیس کا کہنا تھا کہ جائے حادثہ کے شواہد اور ملزم وجاہت علی سے تفتیش کے مطابق یہ ایک عام کار حادثہ ہے،جو ڈرائیور وجاہت علی کی غفلت کے باعث پیش آیا ۔

پولیس نے کہا کہ شہباز گِل کو جان بوجھ کر نقصان پہنچانے کی کوئی کوشش نہیں کی گئی، شہباز گِل نے واقعے کو میڈیا میں ایک قاتلانہ حملےکا رنگ دے کر پروپیگنڈہ کیا ہے۔