جج کی PTI کے جلسے کیخلاف عطاء تارڑ کی درخواست کی سماعت سے معذرت

12 اگست ، 2022

**مسلم لیگ ن کے رہنما عطاء اللّٰہ تارڑ —فائل فوٹو**

لاہور ہائی کورٹ کے جسٹس علی ضیاء باجوہ نے مسلم لیگ ن کے رہنما عطاء اللّٰہ تارڑ کی درخواست پر سماعت سے معذرت کر لی۔

اس سے عدالتِ عالیہ نے قبل عطاء اللّٰہ تارڑ کی ہاکی اسٹیڈیم میں پی ٹی آئی کے 13 اگست کے جلسے کے خلاف درخواست کی سماعت کے لیے مقرر کر دی تھی۔

اب جسٹس علی ضیاء باجوہ کے معذرت کرنے کے بعد درخواست کسی اور بینچ کے روبرو لگانے کے لیے فائل چیف جسٹس لاہور ہائی کورٹ کو بھجوا دی گئی۔

واضح رہے کہ مسلم لیگ ن کے رہنما عطاء اللّٰہ تارڑ نے آج صبح پاکستان تحریکِ انصاف کے 13 اگست کے جلسے کے خلاف لاہور ہائی کورٹ میں درخواست دائر کی تھی۔

عطاء اللّٰہ تارڑ نے اپنی درخواست میں استدعا کی تھی کہ پی ٹی آئی کے ہاکی اسٹیڈیم میں جلسے کو روکا جائے۔

درخواست میں چیف سیکریٹری پنجاب، کمشنر لاہور، ڈی جی اسپورٹس اور تحریکِ انصاف کو فریق بنایا گیا۔

عطاء اللّٰہ تارڑ نے اپنی درخواست میں مؤقف اختیار کیا کہ ہاکی اسٹیڈیم سیاسی مقاصد کے لیے استعمال کرنے کے لیے نہیں۔

درخواست میں کہا گیا کہ تحریکِ انصاف کا ہاکی اسٹیڈیم میں جلسہ کرنا آئین کی خلاف ورزی ہے، جلسے سے روکنے کے لیے متعلقہ حکام سے رابطہ کیا مگر کوئی داد رسی نہیں ہوئی۔

درخواست میں استدعا کی گئی تھی کہ پی ٹی آئی کو ہاکی اسٹیڈیم میں جلسہ کرنے کا اجازت نامہ منسوخ کیا جائے، درخواست کے حتمی فیصلے تک اجازت نامہ معطل کیا جائے۔

قومی خبریں سے مزید